Tribune Lingua Corsa – novembre 2014

TRIBUNE

Sébastianu Quenot

Duttore in sociolinguistica

Dumane serà l’altru eri ?

Eric Zemmour face u giru di e televisò. Ci hà fattu a so casa, u so cummerciu, u so pane. Li piace què. Scumbatte contru à l’Islam ma si piglia per un prufetta. Ùn hè micca omnisciente ma solu omnipresente. Inchjustratu in u passatu, ristabbilisce u peghju di a Francia. Difende l’anni duri di l’assimilazione. Difende a culunisazione. Difende à Pétain è i prefetti di Vichy.

Per stu mese d’uttobre, face pena di vede à Modiano solu sulettu. U Premiu Nobel meritava megliu chè di passà da daretu à un arlecchinu. Zemmour ghjè u sindroma di a paura, ma passerà. Invece firmerà a penna lestra di Modiano. A furesta cresce in u silenziu. U tazzu u face l’arburu cascatu, dicia Gandhi. Cumu serà ch’elli si ritrovanu di più i Francesi in u discorsu d’Eric Zemmour è ch’elli sò elli i primi à fà u french bashing ?

Audimat, gloria à tè

Per dì la in corsu, u french bashing face u buzz. Hè vera, ghjè faciule à fà le falà. A so prugrammazione, si sà, i media ùn la custruiscenu micca per u spannamentu di u publicu ma per u so allargamentu. Hè un prublema fundivu di deuntulugia per i media, di qualità per u serviziu publicu è di vita per a demucrazia ch’abbisogna di divertimentu ma dinù di ragiunamentu. L’audimat face lege, l’odiu mattu face eleghje, è leghje. In una Francia duve ellu si cresce u fossu trà l’elite è u populu, i media l’anu capita, stumacanu i pulitichi. Persi ch’elli sò i Francesi trà Bygmalion, Cahuzac, Khadafi, Thévenoud, Karachi, si ritrovanu in e piulate lampate da i pulemisti è in u silenziu scioltu di Le Pen. Stanchi di e fole di i primi, sceglienu e canzone di l’altri.

Esce da l’angoscia 

Ci piacenu ancu à noi e vechje canzone di Tony Toga, di Carlu Rocchi, di i Fratelli Vincenti, d’una Corsica chè no cridimu asserenata, accucculati una stonda, senza tante minaccie appese. U Riacquistu s’hè fattu speranza, ma anzituttu, ghjera un angoscia. Oghje ghjornu, una parte di a Francia cerca à fà u soiu u Riacquistu. Micca cù a cultura nò, ma cù l’idee faciule, cù un ragiunamentu Ikéa, faciule à stallà.

U Riacquistu di u settanta era inghjennatura, arradichera è creazione. « Eri, oghje è dumane » anu chjamatu u primu discu di Canta. Ind’è a Francia di Zemmour, leghju a ferita di i nostri vechji, quella di nuvembre quarantadui. Aspettendu un segnu da a Francia, anu vistu spuntà vascelli taliani in portu di Bastia. Tamanta dillusione ! Ma dopu à u parapara, hè natu quantunque un soffiu di speranza cù a Resistenza. A Francia di Zemmour, ghjè una Francia impaurita, aggrancata, imbalsamata cum’è una morta. Ghjè un paese di sogni è di carta ch’ùn esiste micca è ch’ùn scambia mai. Cum’è dopu à un ingannu, hè un amore chì pare viulenza. À circà sta stella sparita, pichja u ritornu cum’è un dulore. U tempi fà ùn hè micca un megliu stà. Quessa a strada, ùn ci hè è ùn si pò micca piglià. L’altre vie, quelli chì ci vanu à pasponi anu u meritu di circà le.

Ulysse, ancu ellu un eroe di a nustalgia d’Itacca, hà giratu mondi, monti è castelli. Hà avutu l’animu di caminà, d’ingrandà, senza trimà di paura di pettu à i so nemichi. Si pò « parte è vultà » dice a puesia di Thiers. In u pruvà, in l’ardita prumessa d’un dumane da fà, vince l’omu nant’à ellu stessu è l’asgiatezza di a nustalgia amara.

« Lampà e cunfine »

Attenti ch’ella hè piena di Zemmour a nostra Corsica. Trà u puttacchju « ùn ci hè nunda à fà » è quill’altru « u turisimu solu mi face manghjà », ci hè forse un altra via à truvà. Una via chì «  tesse e sumiglie », e ricchezze è e sfarenze dinù. U mare nostrum era un cumunu culturale trà u vicinu è u luntanu. Da a Tuscana di i Medici finu à a Gallura è al di là, un filu cuntinuu andava da a terra ferma à l’isule surelle. Ùn eramu micca indigeni o negri bianchi. Eramu quelli di u Disingannu è di a Ghjustificazione, dui testi maiò di l’Europa di i Lumi. Eppò hè ghjuntu u Statu nazione.

Hà alzatu fruntiere pulitiche chì sò turnate fruntiere linguistiche. Mentale dinù. Simu stati chjosi è inchjuculiti da e so cunfine. Una cunfine ghjè una fine. Di u mare nostru n’hà fattu una chjostra. Ghjè l’epica di a miseria, di e guerre, di a spalluzzera per a ghjuventù corsa, u più grande esiliu mediterraniu di u 20u seculu.

U Mediterraniu, stu cuntinuu di terra fattu d’acqua è di sogni, s’hè stantaratu in una prigiò di fanga. Battia u scappa scappa in i paesi diserti è simu diventati boia per una causa furestera. È stu mondu miraculu ùn ci hè più. U Statu nazione ùn ne pò più. Ma ci simu sempre è ne vulemu di più.

Di pettu à a felicità di l’ancu à fà, cuscenti di u nostru duvere di cambià, è s’ellu era ellu l’anzianu regime di u nostru tempu ?

Exergue «A Francia di  Zemmour ghjè una Francia impaurita, aggrancata, imbalsamata cume à morte.