Tribune Lingua Corsa – Septembre 2015

Viulenze è paure francese

Da Sebastianu Quenot

Cosa averanu à sparte inseme i giovani agricultori corsi è i tassì parigini? I primi anu bluccatu u giratoghju di u Fangu è si sò invitati in prefettura di Bastia per dinunzià misure discriminatorie à a stallazione, quandu i secondi anu chjosu tuttu u perif pariginu è lampatu duie vitture Uber à capu in ghjò per fà la finita cù sta cuncurrenza illegale. A sturietta ùn dice micca s’è l’agricultori anu pigliatu un veru tassì o un Uber quandu elli sò andati à u Ministeriu. In ste duie situazione, e duie prufessione anu fattu valè e so rivendicazione leghjittime per via d’una viulenza misurata. “Ce qui est dramatique dans ce pays, c’est que pour défendre des revendications, aussi justes soient-elles, et pour avoir gain de cause, nous soyons obligé d’avoir recours à la violence”. Cusì hà dettu u 16 di lugliu scorsu, un ghjudice di Bastia, diventatu sociologu durante u prucessu di i giovani agricultori, travagliadori ricunisciuti. Qualchì ghjornu dopu, u blucchime di i vaccaghji francesi li dava torna a ragiò. A Francia hè un paese di rivuluzione, d’intoppi trà diritta è manca è u solu ADN duve ellu ci hè viulenza, ghjè in quellu di u Statu quandu ellu impone à a ghjente una viulenza simbolica dumandendu li l’usu d’una viulenza fattiva per fà si sente. Finu à pocu, stu modus vivendi lasciava a ghjustizia d’accantu. Invece dipoi a passata di u Mac Do di José Bové, a ripressione di fatti sindicalisti addisperati ma sinceri è fatt’è fine eficaci, accresce a ghjudiziarisazione inghjusta à l’ipucrisia di a situazione. Cusì, per via d’assenza di dialogu suciale nurmale, quante prufessione, piuttostu feminile, sò oghje in via di precarisazione, cum’è in l’insignamentu o in a salute? N’avemu l’esempiu st’estate cù a greva linda linda à l’uspitale di Corti-Tattò è u rimusciu di l’uspidale di Bastia. Si sbaglia u pruverbiu. Acqua cheta ùn sbonda muri.

A memoria d’Aleria

S’è no’vultemu appena in a nostra storia cuntempuranea, in u 1974, l’affare di e fanghe rosse ùn hè statu scioltu di manera nurmale cù a cundannazione di a Montedison. Fù un passu maiò in a difesa di l’ambiu, ma hè statu u bottu, in Italia, contr’à unu di i so brutti battelli: u Scarlino, à piantà i righjetti in Mediterraniu. Avà ch’elli sò stati cummemurati i 40 anni di l’evenimenti d’Aleria, arricurdemu ci l’atti di sta tragedia republicana. In l’anni sessanta, a Corsica tocca u fondu à tutti livelli: esiliu generalizatu, abbandonu di i paesi, identità svalurizata cum’è mai finu à l’auto-odi, nisunu stabbilimentu d’insignamentu superiore, amministrazione tenuta da un Prefettu omniputente è froda eletturale diventata sportu naziunale. Ghjunghjenu a Somivac è a Setco à valurizà a Corsica attempu à u scalu di 17000 pedi neri disgraziati dopu l’indipendenza di l’Algeria. Povera ghjente o agricultori di a mittigià chì a Francia ùn ne sà chì fà. A messa in valore di a piaghja urientale serà per elli. Prublema: à listessa epica, a massificazione di l’insignamentu superiore chì purterà à maghju 68, permette à una parte di i giovani di fà i so studi in cuntinente è di vede d’altre manere di fà. Megliu, à una bella parte di i giovani Corsi allevati in Marseglia o in Parigi, li stuzzica a nustalgia di u paese eternu è paternu. Li trica di vultà. A mundialisazione accresce l’appartinanze fundive. À l’epica, fù accuppiata sta nustalgia à u sintimu d’inghjustizia di pettu à u favuritisimu accunsentitu à i pedi neri. Qualchì mese dopu a cacciata famosa di Liber Bou: “même 200 000 autonomistes corses ne feront pas changer la constitution”, una manata di giovani sottu pressione n’anu una techja di u scandalu di a vinaccia, di e scruccunerie cù e banche, di l’inuqualità. À fiancu à Edmond Simeoni, occupanu a cantina Depeille in Aleria è aspettanu è aspettanu. Silenziu pisivu eppò fracassu di l’armata mandata contru à elli. Cù i tanti Corsi impiegati da a pulizza, a giandarmeria o u Statu in generale, u sintimu di viulenza è di tradimentu contru à i nostri serà statu ancu più forte. Per a Corsica, serà l’evenimentu u più maiò di u dopu guerra.

Francia: update in progress?

Dipoi un annu, si scrive un altru capitulu. U FLNC hà lasciatu l’impegnu di a difesa di l’isula à u muvimentu publicu. L’hà ancu ripetuta st’estate dopu i tanti voti à prò di l’amnistia. L’Assemblea di Corsica hà realizatu un travagliu mai accimatu finu à avà cù voti storichi nant’à a cuufficialità di a lingua corsa, u statutu di residente, a fiscalità, l’istituzione, u PADDUC dinù. Avà ch’ellu s’hè custruitu l’abbozzu d’un prugettu per a Corsica, u guvernu dice chè no simu in l’impussibile. A Corsica hà cambiatu d’urdinatore. L’hà fatta à sintetizà e sfarente sensiblità ma a Francia viaghja sempre pianu pianu sottu à u vechju Windows 8 quellu chì trà dui bug, venia à “terrurizà i terruristi” è à rimpruverà ci cù u tremulu à a voce è cun paternalisimu, a nostra disunione. A verità hè ch’ellu hè contru à ogni presa in contu di a sfarenza è ch’ellu teme oramai di vede una cuntagione di i diritti culturali per l’identità storiche in rivendicazione per diritti persunali à prò d’identità culturale o religiose esciute di l’immigrazione. Allora s’aggranca, blocca tuttu è si para da u focu. In u mondu multipulare d’ottu miliarde d’abitanti, cumu serà ch’ellu venissi cioncu di pettu à a spressione demucratica di solu 320 000 Corsi?