Tribune lingua Corsa – Juil-août 2016

U passu hè incertu è i trampali sò parechji quand’ellu si vole o si pensa pudè scrive à nant’à ciò chì ùn hè ancu à esse, moltu più chì sti pochi tempi vene male à veste si cù i panni di un induvinu chì saperia leghje ind’i muvimenti cilesti, in e curve statistiche o inde l’attualità ciò chì puderia accade. 

Petru Santu  Menozzi

Pussede issu putere saria, in fatta fine, una brama vechja di l’omi pulitichi.  Ferma quantunque un sintimu stranu una cria, quellu di una aspittera. Puru s’è ogni ghjornu traboccanu fatti diventati evenimenti – chì lascerianu dunque una traccia – chì venenu à impettà ci è à accatamansà si, da ùn sapè ne più induve pichjà di capu, induve fucalizà l’        attenzione sullicitata da tante nutizie. Guasi guasi si puderia ancu crede ch’ellu accelereghja u tempu o chì u prisente si vole ingolle sanu l’orizonte. Ma hè spuntata l’estate è, per i nostri rughjoni, di regula sò puchissime e surprese chì, simu avvezzi à fà nice di mette tuttu trà parentesi mentre sti dui mesi di spettaculu. Un affare di ritimu soca o una moda di stagione.

S’aspettanu dapoi qualchì settimana i passa è veni cuntinui di i battelli cù cunfidenza, chì a ci simu francati da a greva spaventevule ch’elli minacciavanu i marinari, averanu rinunciatu cù « ragione », ma ùn hè omu sicuru di nunda. Figurate vi s’ellu hè per cambià u nostru mudellu ecunomicu… Trà a felicità, niscentre appena di certi, è l’azezume di l’altri, ùn saranu forse chè i spiriti inchieti è i rompistacche à imprimurà si di ciò chì si assumiglieria à urgenze. À quella di e rumenzule a ci aspittavamu, i cuntorni di sta crisa – una di più, ciò chì si cerca quantunque per ùn annuià si micca – chì parianu luntani, si facenu di più precisi è suluzione ammanite belle poche. Ch’elli si contrinu una pulitica à longu è à cortu andà è interessi ecunomichi ùn vene sfaticata, hè sicura, soprattuttu quand’ellu ci vole dinù à move l’impegnu di i citadini.

Calindariu pre-eletturale

Quantu sò i Ponzii Pilati à lavà si ne e mani…inde l’acqua chì forse ci hà da mancà. Ci vene difficiule a maestria di a risorsa, puru s’è no avemu capitu a lezzione, cù u tempu, chì i fiumi vanu sempre à lampà si in mare. Vederimu di sittembre di chì manera si feranu u bilanciu, i conti è si discuteranu e rispunsabilità.

Ci sò l’abitudine chì ùn stupiscenu più à nimu, una spezia di cadenza – segondu u viotu di i ghjorni o di e settimane -, quella di i scali di i persunaghji detti publichi invitati à sprime si nant’à sugetti chì li premenu pocu, è finghjemu ancu noi di purtà interessu à i so parè. È po ci sò quelli ubligati à vene. Ch’ellu ùn abbia à apre si, cù l’affaccata di u Primu ministru, u ballu di e visite di i membri di u guvernu ver’di a pruvincia. D’altronde, fora di u solitu discorsu riprincipiatu, cosa si aspetteria ? Accuntentà si solu di ripete, torna, ciò chì tutt’ognunu averà digià capitu, o si pò pensà à unu o dui annunzii, qualchì apertura accumpagnata da strinte di manu. È, in sottu sottu o à palesu, ricunnosce u terrenu cum’ellu l’impone u calindariu pre-eletturale.

L’ora di a rientrata

Un custattu  torna, anu persu l’omi pulitichi u so putere di cunvince cù e parolle è una forma di charisimu – ùn si dimenticheghja ben intesa u talentu oratoriu di certi, soprattuttu inde l’isula. U « tuttu-và-per-u-megliu », cum’è una litania da fà da formula magica, ùn basta più à suddisface a pupulazione. Ci crede solu quellu chì a dice, ancu s’ellu si cerca à accertà la è puntellà la da infurmazione sicure, hè purtata via da u dilluviu di i discorsi numerosi è cuntradittorii, è ferma più chè debbule da assicurà un prugramma per e prussime presidenziale. Masimu chì u mese di ghjugnu scorsu ùn hè statu tantu appaciatu. Trà e manifestazione liate à a lege Travagliu chì saranu forse interdette da quì à pocu – in u frattempu ùn si hè guasi più intesu nunda di Nuit Debout -, e viulenze di e forze di l’ordine chì pare una scuperta è l’atti terruristi chì renderanu inevitevule, hè solu un’ipotesi, u prulungamentu di u statu di urgenza – si pò discorre appena di a so efficacità dopu l’azzuffi trà sustenidori in Marseglia – unipochi brameranu di andà si ne in vacanze.

Pianu pianu si avvicinerà l’ora di a rientrata è, cun ella, sta piccula angoscia chì, tuttu ciò chì paria suspesu hà da ripiglià u so corsu. Sittembre saria u mese di u ritornu à a realità è di a sbriachera, è à tempu, l’impressione di principià qualcosa di novu, per quessa ch’ella hà una sumiglia a fine di l’estate cù u capu d’annu. Ma cù sti clima cambiarecci è e temperature estrose, bisogna à esse attenti à u mutà di e stagione, o dicendu la di modu scherzosu, à a so allunghera.