Nucenze perse

Tribune lingua corsa

S’ella hè l’esciuta di un libru di un autore chì si seguita u mumentu predilettu da sazià e so brame, scurdendu si di u tempu di l’attesa, omu pò dinù apprufittà di l’occasione da turnà à passighjà à mezu à l’opera publicata digià da percepisce megliu ciò chì si era solu intravistu, vultà cù a distanza à e so sperienze di lettore.

Petru Santu Menozzi

Principiendu à Massacre des innocents ci saria l’impressione di un ritrovu, una ricunniscenza fatta fine, u sintimu, una cria, di esse rassicuratu da unipochi d’indizii lasciati per ùn perde si. In u listessu tempu, puru regulare l’appuntamentu cù un libru novu, omu ùn si puderia fidà à e so abitudine venute scumudate per via di mute è scarti in a scrittura chì rispondenu à u prugettu è à e scelte estetiche ch’ellu apprufundisce l’autore, à a manera di accustà tematiche altre o scavendu quelle di più recurrente. L’ultimu rumanzu di Marcu Biancarelli hè di’ssi libri chì parenu appartene à un inseme di più allargatu custruitu à pocu à pocu, cum’è pezzi di una musaica, è piglianu sensu in u chjama è rispondi trà un testu è l’altru. Si hè dettu, forse troppu prestu, chì un ciculu sfarente era statu iniziatu dopu à Murtoriu, stu rumanzu cumpiendu un periudu chì pudia raprisentà una unità. Ma e rumpiture à le volte si facenu lene, cù Murtoriu ci pare chì si trattava di più di un libru varcatoghju duve e tematiche sfruttate dopu principiavanu à sbuccià. In un certu modu, i trè ultimi rumanzi di Marcu Biancarelli sò puemi di una errenza è di una ricerca « iniziatica » chì sbocca à nantu à l’amparera di una perdita, quella di l’innucenza.

Omi urdinarii

Issa parolla hà significati parechji liati stretti trà di elli. L’innucenza ùn hè solu u statu di chì ùn hè culpevule, dice dinù a prussimità cù l’ignuranza, postu ch’ella insegna a parolla u statu di purezza di chì ùn hà cunniscenza di u male, è a simplicità di a persona chì ùn cunnosce nè l’omi nè u mondu è rimandanu spessu à a zitellina. D’altronde, in Massacre des innocents, a viulenza fatta à i criaturi – basta à pensà à a riferenza insignata da u titulu – hè propriu un tema chì struttureghja u rumanzu, forse si pò percepisce quì un accennu à l’opera di Dostoïevski. Ci si puderia leghje, in i percorsi di certi persunaghji, a spressione di una nustalgia di’ssu statu, causa di un ritornu pruibitu è chì abbisogna un travagliu di dolu. È issa perdita hè cunseguenza di l’attu viulente, si tocca tandu una interrugazione chì puntelleghja ogni rumanzu. L’autore cumplessificheghja u raportu ch’elli anu i so persunaghji cù a viulenza cuncentrendu si à nantu à u mumentu di u passeghju, quand’elli a sperimentaghjanu è ch’elli si avvianu ver’di una forma di barbaria ch’elli usanu o ch’elli patenu, sapendu chì e prove da fà u viaghju à l’arringuersciu ùn saranu chè vane. A dumanda di u perchè ciuttà si in a viulenza pò intimurisce quelli chì ci si avvicinanu, scrive à parte si da issa materia sarà, impettendu la, una manera di scunghjurà la è forse di ricusà a so banalità. Hè diventata questa ogettu di studiu, ancu per i storichi. Ùn hè ciò ch’ellu cerca à disciuplicà Christopher Browning in u so Ordinary men, analizendu e mutivazione è l’azzione di un battaglione di a pulizza alimana chì hà scompiu Ghjudei in u 1942 ? Per dì la à l’accorta, in issi rumanzi, Murtoriu, Orphelins de Dieu è Massacre des innocents, a perdita di l’innucenza hà ragioni multiplice : essendu vittima di a viulenza è dunque entre di modu subitaniu in cunfrontu cù a realità cruda di un mondu cum’è s’ella era una svirghjinata, ghjuvendu si di a viulenza custrintu da una vindetta chì u cuntestu impone o puderia esse un attu chì nisun mutivu raziunale spiegheria, solu a cunseguenza di una pulsione da sfugà. Di una banda u paragone vene lindu trà Traianu, Marcantonu è Vénérande, sò in l’obligu di fà listessa scelta, aduprà i listessi mezi chè quelli ch’elli anu cundannatu da compie un ciculu iniziatu cù u sacrifiziu di u « nucente ». Puru s’elli risentenu rimorsi è ch’elli s’interrugheghjanu issi persunaghji, ùn ci hè in u racontu a vuluntà di porghje una murale qualunque. A fiura di u sacrifiziu chì ace nasce un parallelisimu trà Mansuetu è u fratellu di Vénérande, hè da cunsiderà forse cum’è un puntu di partenza, quellu di a vindetta necessaria assumigliendu si à un duvere, senza a ricerca di una pussibule redenzione ma cù certezza di agisce da risponde à un bisognu di ghjustizia.

A viulenza chì ognunu porta

Inde Massacre des innocents, ogni persunaghju si trova di pettu à a viulenza è pare chì ognunu a purtessi in sè stessu. U mumentu di u navifraghju è di u stabilimentu à nantu à sta terra incognita facenu da rivelatore. Si sà chì l’isule, diserte o micca, ponu dinù esse i lochi di l’utopie fiascate. Quandu chì sò per trafalà si ne e cunvinzione è i codici suciali è murali, certi lascianu larga balia à una viulenza firmata si zitta – si tratterà tandu di un parte di a natura umana ? – invece altri, cù a cunniscenza ch’elli anu di ciò ch’ella cagiuneghja a pratica di a viulenza lottanu contru à a tentazione di fà ne usu. Ciò chì face a ricchezza di u rumanzu ghjè ch’ellu ùn scrive un assaghju Marcu Biancarelli, scurticheghja situazione cù a forza sola di a descrizzione chì sprime l’esuberanza di certe scene è à e dumande ch’ellu ammenta ùn arreca risposte definitive. Da a banda di chì leghje sarà lettura catartica cum’è per a tragedia, puru s’ellu cumparisce di manera fugace ogni tantu u buffunescu.