Saranu compie e revoluzione di Corsica ?

Ci sò di i libri chì movenu subbitu subbitu l’interessu rispundendu à un bisognu, chì venenu à sazià una brama è chì deverianu pruvucà riflessione è cuntrasti

Par Petru Santu Menozzi

Ma a vita di una publicazione seguita vicende chì omu ùn riesce à anticipà. Di u libru novu di Antoine Franzini – duttore di storia chì hà publicatu dui studii di primura, u primu à nantu à a Corsica mentre u XVu seculu, l’altru trattava di u cunfrontu pulemicu trà dui omi, à l’epica di a Revuluzione francese, quandu chì l’intimu è e lotte pulitiche s’intrecciavanu – esciutu di nuvembre scorsu, si ne hè parlatu pocu è micca. Bisogna à ricunnosce chì in u campu sturiugraficu numerosi ùn sò i spazii è e stonde da pudè discorre è rende contu di una pruduzzione. « Un siècle de révolutions corses » s’inserisce in un cuntestu edituriale riccu chì, dapoi unipochi di anni, publicazione di fonte (si pensa à a currispundenza di Pasquale Paoli), di biugrafie, di traduzzione di scritti (quelle di a Giustificazione), di atti di cullocchiu (i Scontri storichi di Lisula per indettu) si succedenu è ci permettenu di lampà un sguardu altru à nantu à u XVIIIu seculu isulanu. Da sta materia, fatta à vulumi è articuli spargugliati, si aspettava una sintesi chì, à dì la franca, ci tricava di avè ne una ammanita, dopu e cuntribuzione fundatrice di Farrandu Ettori in u Mémorial des Corses è di Franco Venturi in u o so ampiu Settecento riformatore.

Cù una scrittura linda chì si chjappa u lettore, Antoine Franzini ci porghje una opera assignalata, ghjuvendu d’introitu per chì ùn hè à capu di l’evenimenti accaduti inde l’isula mentre issu periudu, dendu à un publicu allargatu a pussibilità di avè accessu à un mumentu storicu chì si ne parla assai, ma chì fatta fine ferma pocu cunnisciutu o adurnatu à mitulugie è à ghjudizii ideulogichi.

Messa in perspettiva

È, à tempu, participeghja à apre vie di ricerche nove per via di u so travagliu à nantu à ducumenti, inediti à le volte, è per via di l’accostu sceltu.

Ùn hè solu quì un sbucinime crunulogicu chì si accuntenteria di una descrizzione di i fatti, ma di una messa in perspettiva puntellata da una prublematica originale. Prima di parlà ne, abbisogna una piccula arretta. A periudisazione scelta è a manera di assestà i sfarenti mumenti sò propriu pertinenti chì, puru s’ellu hà ogni periudu una cuerenza, a so articulazione arreca un significatu in soprappiù, senza cascà in a trappula di una successione linearia di l’evenimenti postu ch’elle sò messe in risaltu dinù e discuntinuità. U fattu d’integrà à a riflessione a Revuluzione francese è u Regnu anglocorsu caccia, in un certu modu à u 1769, l’impressione di una cunclusione. Si capisce tandu u plurale di a parolla revuluzione, permettendu di sprime u carattere particulare di ogni periudu.

Ogettu di ricerca

Issu studiu vene arrimbatu à una prublematica chì hè di primura è originale. Si hè datu cum’è obbiettivu Antoine Franzini di sculinà e cundizione di a nascita di un sugettu puliticu mentre issi decennii, essendu attente à ciò chì si puderia ricaccià da e sperienze di i revuluziunarii (si pensa à e sfarente prove di dà un « sistema di guvernu » o custituzione à l’isula), da i scritti pulemichi o ghjustificativi, interessendu si dinù à a vulintà di « cunquistà » l’opinione à l’epica. Issu aspettu era sfruttatu pocu finu à avà è u fattu ch’ellu si fussi ciuttatu in isse fonte l’autore travagliendu à nantu à una multiplicità di fogli d’infurmazione, di « gazettes » di l’Auropa sana, c’insegna chì l’isula era un spaziu apertu chì era fighjatu è chì fighjava altrò. Puderia ancu esse un ogettu di ricerca ampiu questu, analizendu a cuncurrenza di i raconti prudutti è riprudutti da issa stampa, l’interpretazione ch’elli davanu di l’evenimenti, l’usu ch’elli ne pudianu fà l’insurretti chì ùn pò esse nucente a lettura ch’ellu si face di’ssi articuli.

Voltanu in mente

Per chì si vole cunsacrà à u studiu di u XVIIIu seculu in Corsica, ùn li vene tantu sfaticata, chì ùn si move mancu appena in un locu appaciatu, causa di memorie chì entrenu in cunfrontu, di l’usi presenti di u passatu chì ponu esse cuntradittorii è puderiamu ancu ammintà e strumentalisazione segondu i cuntesti pulitichi (ci saria un studiu da fà in quantu à a manera ch’ellu hà di leghje è di ghjuvà si di a storia u muvimentu naziunalistu oghje). Voltanu tandu in mente e prime pagine di a racolta di assaghji di François Furet à nantu à a Revuluzione francese. Scrivia ellu chì, à u storicu chì studieghja un periudu simule, attualizatu sempre, li tocca à prisentà un permessu di ricerche, à dà a so opinione, è attraversu à questa si farà a lettura di u so travagliu. Puru s’ella ùn hè mai nucente una interpretazione storica, per ciò chì tocca à a Corsica, si pò fà u custattu ch’ellu si hè allegeritu u pesu di l’ideulugie, lascendu un spaziu di più assirinatu à riflessione è ricerca.