« Something is rotten… »

Si dice chì u publicu inglese l’aspetta issu pezzu d’infrasata, è ch’ellu mette à ride quandu chì si appronta à dì la l’attore tantu ella hè cunnisciuta, ne pare guasi viota di sensu, ma basta quessa da crede si ciuttati in Elseneur.

Petru Santu Menozzi

U geniu di’sse poche parolle hè ch’elle pruducenu una fiura chì omu pò adattà à ogni situazione. Ammintendu la, ci puderia scappà a risa ancu à noi, forse cù una cria di cinisimu. S’è no femu casu, propriu, à u significatu di u verbiu, ci ne puderiamu ghjuvà da insignà u cuntestu isulanu. Iè chì puzza a Corsica è à u sole, puru s’ellu hè statu pocu mentre issa statina, ùn li hè riesciuta à scaccià u fracicume chì si sparghje è chì impecia e nostre mente. L’usu di’ssa parolla hè solu metaforicu quì, lasceremu da cantu e rumenzule. Saranu di più e nostre cuntradizzione à puzzà. Per disgrazia, in quantu à issu generu di lozzu, ùn sò ancu state studiate e pussibilità di a trascelta è cuntenidori specifichi da lampà lu ùn ci ne hè. E tanfate veneranu da u baschicciu di e cunvinzione rinnegate – cambià di andatura soca sarà un eserciziu puliticu quant’è issa capacità di scurdà si – quandu chì u vernice di i discorsi d’intenzione crepuleghja.tandu, cumu accunsente à dà a so cunfidenza à pulitichi chì mandanu à caternu rivendicazione chì avianu participatu à custruisce l’identità di un muvimentu ? À sente à unipochi, u beatu « Cullettivu di i prufeziunali di u liturale », u nostru orizonte cumunu venerà fattu à baracconi è à « transats » da suddisfà l’interessi di un turisimu massicciu (issa manera di cuncepisce u turisimu pare ch’ella sia à l’anticogna oghje) invece d’imprimurà si di ciò ch’è no lasceremu di’ssa terra. Puderanu certi rimbiccà ci u lirisimu di’ssu pensamentu dicendu ch’è no ùn cunsideremu abbastanza l’imbusche di u sviluppu di l’isula. Hè bella capita, u soldu chjama u soldu è e marine sò manghjerie dipoi un pezzu, ma s’elli sò i Corsi à tichjà si, tandu li si pò perdunà tuttu. Simu stati stupiti, pocu à dì la franca, di vede chì ci sò naziunalisti à praticà u paradossu è à dumandà cun forza ch’ella sia mudificata a lege liturale, puru s’elli a difendianu prima, à mughjà appressu à u Padduc, bramatu à l’epica, chì avà li mette e pastoghje.

Cù lu stessu destinu

Omancu, un puntu pusitivu ci hè, u cunsensu trà ogni famiglia pulitica hè statu trovu. È à u Statu, criticatu nanzu per u so lascia corre chì hà inghjennatu disguasti tanti, li si rimpruvereghja di cuntrullà a legalità di’ssi stabilimenti è di ghuvà si di u Padduc da creà un clima di tensione in Corsica, siccome ùn ci sbrugliemu à di per noi da fà nasce tensione.

Hè a solita cantilena, quand’è no ùn vulemu vede e nostre sviere, vene faciule di abbaghjà contru à u Statu. Mentre chì si aspettava una pusizione forte è chjara di l’eletti di a Cullettività, provanu solu di tene in equilibriu è ci si parla di una cummissione da mette in opera, torna. E fune longhe quì ùn diventanu mai sarpi. S’è omu si pò rallegrà di l’iniziativa di l’Esecutivu trattendu si di Cavallu, da assicurà una prutezzione à issu pezzu di terra rosu da a speculazione, ùn si ne pò quantunque accuntentà chì si assumiglia appena à un alibi da accecà ci. Una pulitica di l’illusione, ma forse ch’ella hè sazia a Corsica di l’illusione.

Quandu hé palisata a vulintà di circà à accuncià si cù a lege, cumu nigà i periculi da vene per u liturale isulanu ? Ùn vale à esse Cassandra da antivede ciò chì puderia accade trà turisimu à l’ingrossu è appititti maffiosi. Valurizemu u liturale cù e « paillotes » è pruibimu l’andati muntagnoli à i pastori, dopu à qualchì centru cummerciale inauguratu in pompisi, saria ora di apre u nostru disneyland corsu.

Aria Tragica

In tantu ci inchjucchemu à cunsiderà da mudellu ecunomicu unicu u turisimu, ma simu avvezzi à viaghjà à currente cuntrariu. È puru, basteria à lampà una ochjata altrò : e mosse di i Veneziani, a Cruazia, e Baleare sò tanti esempii à insignà ci chì a via di u turisimu eccessivu ùn hè propriu un arnese di sviluppu è di spannamentu per un territoriu è a so pupulazione. Una intestardizia imbecille ci cunduce à fà e scelte più pessime di manera cuscente. Venerà dopu u tempu di i lagni quand’è no ci accurghjeremu di e so cunsequenze, cù l’aria tragica, cum’è s’è no ùn eramu rispunsevuli di e decisione pigliate. Ci piserà tandu a culpabilità, forse. Ancu puru s’elli sò i nostri sbagli, truveremu una ragione di vittimizà si. In quantu à l’oghje, u ritrattu più lucidu di a Corsica, ùn sarà a canzona « Beauté fatale » di I Muvrini ? Da cunclude, i tag in Carghjese contru à u gruppu sprimenu un statu di l’identità pocu quentu chì si praticheghja ancu per issi lochi l’ostracisimu. Iè, puzza in veru a Corsica.