Sunatu hè lu cornu

Tribune

Si sarà avvistu omu ch’ella hè principiata, dapoi qualchì settimana, a stagione turistica. À a divizia di i motti chì facenu u vantu di a destinazione isulana, venenu appaghjati pannelli publicitarii prumuziunali, ritratti di paisaghji mettendu in valore un ambiu naturale spersunatu è l’illusione di a so virginità

Per Petru Santu Menozzi

Si sà quant’elle pesanu oghje sempre minacce à nantu à u liturale, hè un altru capatoghju. È puru, ogni tantu, si riesce à sculinà, luntanu, a prisenza di una custruzzione umana. À le volte affacca ancu à u primu pianu da supranà ci, ferma è massiccia, da fà nasce à tempu à l’esutisimu di a distanza tempurale, un allusingu per issi munumenti testimoni cum’è à l’epica rumantica. E torre, u so aspettu è ciò ch’elle ascondenu, anu mossu l’ispirazione di chì impenna è numerosi sò stati i puemi à ammintà le, fendu ne u spechju di una identità, u simbulu di una forza chì e vicende ùn currompenu, dicendu dinù l’inchietudine è a debbulezza di una isula di pettu à periculi. A penna, quand’ella piglia u slanciu è chì ùn la ritene più nunda, accade ch’ella ne fessi ancu troppu. Si pò capisce chì à a petra austera ùn li si caccia parolla, cum’ellu a scrisse Antone Bonifacio : « Parla, o Torra, dimmi lu to passatu ! » Sò diventate e torre stantare, sintinelle, guardiani, tanti sinonimi. À chì prò vulè si la allungà cù un introitu simule ? Sarà chì a cumparsa di l’associu chjamatu « Guardiani di a memoria » averà fattu nasce una « currispundenza », ripigliendu guasi listessu campu semanticu.

Sintineddi

U nome di’ssu cullettivu cumpostu di militanti di e prime stonde di u naziunalisimu – chì d’in prima senza cunnosce nunda ci pudia fà pensà à un gruppu di sustenidori di una squadra spurtiva – ci hà interrugatu. Ùn si tratterà di ghjudicà s’ella era di opu issa iniziativa o di dà un parè in quantu à a legitimità, u carattere ghjustu di’ssa creazione. Lampà solu una ochjata à un intitulatu chì ci si pò sente un tonu severu una cria, mischjatu à una certa sulennità lirica. L’usu di a parolla guardianu pò stupisce, ma palesa subbitu un missaghju. U so significatu più simplice indetta a persona incaricata di a cura, di a custodia di un locu, di un ogettu, di una idea pò dà si ancu, vene sottuposta chì issu affare abbisogna una prutezzione. S’è no ci inultremu appena di più, saria a persona pussedendu e qualità è e cumpetenze atte da assicurà ne u mantenimentu o a difesa. Seguitendu listessu filu, in un partitu – postu ch’è no ciuttemu propriu in u puliticu – saria u partigianu di una linea ortudossa. Issa parolla insegna dunque un periculu chì ùn hè ancu à ghjunghje ma chì omu pò scorge, o ch’ellu hè spuntatu digià. Una lascita chì u so sensu si perderia, a brama forse di turnà à avè un rollu, è di fà si sente, à nantu à a scena publica massimu quandu chì sò leve nove, chì spessu ùn anu avutu cuntattu nisunu cù e prime mosse naziunaliste, à impersunà u muvimentu oghjincu. Si puderà riassume issu fattu à un cunflittu trà generazione, à una incapiscitura mutuale ? Tandu accuppià ci a memoria ùn pare cusì strana. Incalcà ci di manera esigente, sprimeria l’angoscia di una dimentichenza ; a memoria vista da risorsa, ma dinù da tesoru chì apparteneria à un gruppu, guarante di un pensamentu schjettu, chì riesceria à francà la da manipulazione è sviere. Sarianu dunque isse persone i testimoni di una sputichezza di l’ideulugia, issu rollu ch’elli assumenu, cù un versu nustalgicu chì omu percepisce faciule, ùn sarà in un certu modu, una dumanda di ricunniscenza ?

Aiò tutti fratelli chì hè l’ora

In tantu, a creazione di’ssu gruppu hè dinù spressione di a vita di un muvimentu chì li hè statu difficiule di francà u passu da u militantisimu à a realità di u putere cù ciò ch’ella impone cum’è mute è si ne stà ciuttatu, invece, in una situazione mezana. Hè dinù sintumaticu di una distanza allargata si, o risentuta cusì, trà u terrenu (e vulintà è e brame chì ne sorgenu) è l’azzione pulitica cunsiderata forse troppu cunsensuale. S’ella hè parsa necessaria di fà valè un discorsu ramintendu i « fundamentali » hè a prova di una insudisfazione. Di l’altra banda, issa pusizione di saviezza, chì l’anni è a sperienza li ponu permette di rivendicà à i « Guardiani », si face cù cundiscendenza una cria. Certa, l’attori di un periudu simule ponu arricà un sguardu riflessivu à nantu à l’oghje dendu li prufundezza per via di a cunniscenza di i sfarenti mumenti di u naziunalisimu, fendu propriu u bilanciu di i so falli è di e so riescite, ma u risicu quì saria u dogmatisimu chì ùn si puderianu prisentà i soci di’ssu gruppu pusessori di una verità attraversu à a quale leghje una storia diventata cumuna. Issa presa di parolla chì à principiu si assumigliava à una critica di l’andatura chjappa da a maiurità, ancu detta in sottu sottu, si avvia ver’di una manuvra strategica, chì pare di cuntrà si cù u cuntestu. Di fatti, l’unione di i muvimenti autunumisti pruclamata in pompa – troppu prestu – da furmà un partitu di guvernu hè digià per scioglie si. Si pò tandu dumandà omu s’è u mutivu primu di i « Guardiani » ùn hè solu, mettendu ci pressione, un calculu puliticu.

Invece, s’elli sò à sunà u cornu i « Guardiani di a memoria », altri l’anu fatta dinù tucchendu prublemi fondi di a sucetà isulana è di altrò, cum’ella si hè intesa in Bastia u mese scorsu cù i « lanciadori di alerta ».