Tribune langue Corse – décembre 2014

L’incantesimu di Natale ?

Da Sébastien Quenot

Cù Natale, volta ogni annu u cuntrastu nant’à i veri valori di sta festa. À chì si ramenta u calore di e veghje in paese, à chì briuneghja contru à u fretu in chjesgia. À chì dinunzia u cunsumerisimu oghjincu, à chì sunnieghja à a nova Xbox. Simu ind’è l’opposizione tradiziunale trà u spirituale è u cummerciale, trà ciò chè no simu è ciò chè no cridimu d’esse. In l’accatastu di e nutizie triste imbellite cù Instagram, Natale vene cum’è una treva.  S’aspetta cum’è una stonda d’incantu per noi tutti. Cù u sviluppu di i canali d’infurmazione in cerca di disgrazie, è a so amplificazione cù e rete suciale, tuttu ci fala sempre addossu : crise, guerre, malatie, disimpiegu è addisperu.

Ùn ci franchemu più di nunda, mancu u culu pulputu di Kim Kardashian. Allora più chè mai, avemu bisognu d’omancu un illusione passaticcia, a credenza d’un Natale da festighjà, un caprettu à manghjà ! Ci mettimu in croce per fà piacè à unu è à l’altru, per esse megliu un altru annu cù centu risuluzione in capu. Iè, dumane ferà ghjornu.

A religione di u catì

Una manata di puritani isulani si portanu in collu a fiura idealizata in biancu è neru di a sacrata famiglia è di u vechju fucone. Tutti in carrughju, piglianu à ruchjittate e figure culurite di Barbie è di Spiderman. Nasce u para para. Cridite voi ? Nò, ùn hè micca cusì. L’eroi cummerciali, simu noi i primi à cumprà li. Segnu di putenza, capite ? A ci la dice Barbara Kruger : « compru dunque sò ». U supermercatu ci accoglie tutti à bracce aperte è noi cridimu à a religione di u catì. Eppuru, à vede strazià i parenti in i soi l’andati, ci hè da chì avè a nustalgia di l’aranciu merzu, merzu ma biò. Natale, ghjè a muntagnera di l’omi d’oghje.

In a sucetà turistica, cugliemu l’estate in piaghja è spulemu l’inguernu. « Toccu i freti di nuvembre », dicia Rocchiccioli, avemu bisognu di racoglie i cori ma ùn la sapemu micca fà. Allora aspettemu Natale per dà un sensu à i danni di l’estate. Imbambuliti, i corci parenti cercanu à stancià a sete di ghjochi è d’amore di i figlioli, baterchjati tutti i ghjorni à colpi di publicità.

Un babbu assente crede di cumprà si à bon pattu un amore beatu. Un altru lampa un ochju à l’appiecazione di a so banca per cummandà un ultimu rigalu. U catì digià pisivu, un coppiu pianta e spese per rancicume credendu d’esse savii. Quandu elli passanu à a cascia, unu ramenta à l’altru una citazione prufonda d’un articulu di Psychologie magazine : « ùn ci vole micca à fà crede à i zitelli ch’ella hè troppu faciule a vita. Dui rigali và bè, ma u troppu stroppia ». Iè, Natale ghjè un sognu zitellinu è u sunniacciu di i parenti. Sintimu di culpabilità, rinunziu à i so sciali, dicembre ghjè u mese u più longu di l’annata per i zitelli ma per i parenti dinù. Aiò chì hè festa !

Nascita è lascita

Natale ghjè u tempu di a ghjuventù, di a nascita è di a lascita. A nascita di u bambinu ghjè u principiu d’un operata, a purezza d’un ancu à fà, una scumessa. U curagiu arditu chì ci manca spessu in l’ambiu di a realpolitik, l’ideulugia di a fine di l’ideulugie, u diktat di u disincantu è di u rinunziu. Quandu l’impussibilità d’un megliu andà face lege ùn hè più un sbagliu ma un ingannu. À rombu di sente ch’ella ùn vale a pena di sunnià, ùn sunnieghja più a ghjuventù. Allora serà Natale una festa d’un altru tempu ? À u Messicu, in Sivens è in altrò dinù, quandu ella si vole indià, si face tazzà o intrappulà da i banditi di Daesh. Idea strana di l’educazione è di a demucrazia. « Ùn hà micca sempre ragiò a ghjuventù, ma a sucetà chì a scunosce è chì a mena hà sempre tortu » dicia Mitterrand. Sbaglià si, si sbaglia ancu u prete à l’altare.

L’omi d’oghje si sentenu incapaci à trasmette una lascita più bella chè quella d’eri. Cercanu palliativi fendu u para piglia è teni nant’à i parastasgi di i supermercati. Hè più faciule d’ammanì a robba chì di tuccà e stelle. Allora per sta notte di Natale, u più bellu rigalu ch’omu possi fà à i giovani, ghjè un rigalu à i maiò, un rigalu à longu andà : un sguardu benignu nant’à a  ghjuventù è un paghju di spechjetti.  Andemu fora à guardà a luna è guardemu più luntanu. Circhemu in e stelle a cometa 67P. Cù Philae, ci truveremu  un pezzu d’amore è d’umanità.

È s’ellu era cusì Natale, un ghjornu d’incantu per i zitelli, una notte di duvere per i maiò è per noi tutti, un tempu d’utopia ?