Tribune Lingua Corsa

A forma di u viotu

Cumu si puderia dà una forma à u viotu ? Hè una dumanda strana quessa è a risposta pussibule ùn pare ammanita micca.

Par Petru Santu Menozzi

À dì la franca, ùn si hà mancu appena l’ambizione di riesce à disciuplicà qualchì equazione di fisica, causa di e nostre capacità debbule assai, piuttostu di sculinà di chì manera ci pudemu figurà u viotu di un locu, quantunque a so saturazione, u so carattere di spaziu « pienu », postu ch’ellu hè praticatu, fattu à strati sopraposti si à pocu à pocu unu à nantu à l’altru da fà lu di più zeppu è ch’è no pretendimu di cunnosce abbastanza. Quandu chì, à issa prisenza effettiva di u locu, ciò ch’ellu c’insegna, ùn ci si face più casu, o chì issa prisenza ùn ci sulliciteghja più, diventata banale, lascendu larga balia à u smintecu chì, à a zitta è à a muta, vene à stabilisce si. Eppuru, accade ch’ellu spunti u sintimu di un scomudu, natu da u scartu chì omu pò percepisce trà ciò chì pare (vene à dì una maghjina custruita) è ciò chì hè.

Da riassume issa impressione in corte parolle, ci stà d’incantu u versu di Ghjuvanteramu Rocchi, ripigliatu spessu è entrutu guasi inde l’usu cumunu per via di a forza di u so dì : « di più chè cusì ». Issu « cusì » hè u locu travestitu, neutralizatu, persuasi ch’è no simu da e raprisentazione chì l’anu appannatu è mantenutu in una certa luntananza chì riesce, à parte si da una memoria visibile, à inghjennà u scordu. À l’accorta un locu mutatu in pruduttu di cunsumu turisticu. Appaghjà « di più » à l’avverbiu hà u valore di un’azzione, a vuluntà di andà al dilà, di travaglià à le volte ancu contru à sè stessu, d’incrinà fiure fatticce. Schisendu ogni forma di lirisimu, vene permessa di ricunnosce ch’elli anu i lochi un linguaghju propriu chì sprime a leia cù l’omi è issu raportu s’intende cum’è un dialogu cuntinuu.

Tradizione turistica

Ùn hè opu di allungà torna a funa. Simile avvinta ci ghjuvava solu di prologu da ammintà l’osservazione di u filologu talianu Maurizio Bettini chjappa in un libracciolu di soiu publicatu pocu fà Contro le radici. Avventa ellu, in e sucetà oghjinche, segni di un interessu novu per a parolla tradizione, prisenti in i discorsi è l’attitudine, accumpagnatu da l’idea di un ritornu. Cuncentreghja a so analisi ingiru à u sensu di’sse manifestazione è à u so carattere spessu artificiale. A primura per a tradizione veneria prima in reazzione à un prucessu chjamatu « d’omologazione », rinfurzata da a brama di sfarenzià si di l’altru. In un capitulu, si pianta u so sguardu in Corti, un esempiu chì puderia spechjà fatta fine a Corsica sana. U racontu di una sperienza vissuta ch’ellu face l’autore ci palesa l’assurdu di una situazione ch’è no ci simu avvezzati à cunsiderà cum’è nurmale.

A piazza Gaffori chì averia pussutu sprime un raportu specificu à una storia è à un patrimoniu era diventata a copia di tante altre lucalità aurupee avendu per ossessione l’attività turistica chì pruduce u scordu. Ma inchjuccute sò e statule, quantunque incucinite facenu nice di firmà aggrancate da ùn palisà a so cunfusione, cuscente forse di a so inutilità. Prulungheghjanu in vanu i so sforzi da cunservà u so cuntegnu à mezu à una folla spenserata o di pettu à a buriana d’inguernu. È Ghjuvan Petru Gaffori, intrepidu, indetta sempre qualcosa chì ùn hè più o chì ùn hè mai statu. Sò parechje l’interrugazione à frasturnà ci tandu. Cosa ferma di un locu quand’ellu hè statu privu di u so significatu, o ch’ellu ùn hè più ricunnisciutu ? Di chì manera assucià turisimu è messa in valore di un capitale storicu è patrimuniale senza fà ne una mercanzia (u lettore puderà criticà a nostra niscentria) ? Ma oghje e prublematiche ùn sò quesse. Si tratta di i mezi da mette in opera da allungà una stagione chì ùn ne finisceria più, un turisimu litturale cù a so infilarata di « paillotes » è di stabilimenti di lussu chì anu poca primura di l’ambiente. Perchè nò. Certe marine ùn le puderemu avvicinà da quì à pocu chè sfuglittendu e pagine di i magazini chì ne facenu u vantu.

Figuremu ci quant’ellu hè cambiatu u nostru mudellu ecunomicu, mentre chì altrò vene criticatu u turisimu massicciu è chì unepoche di cità cercanu di limità ne i flussi (si pensa à Venezia, Barcilona o Amsterdam).

Vie altre

L’imaginazione hè poca quandu si tratta di riflette à forme alternative di turisimu, sarà liatu dinù à u fiascu o l’inesistenza di pulitiche culturale fattive è ambiziose chì puderianu articulà attività ecunomiche, sviluppu è cultura. Spessu oghje l’argumentu culturale ùn pussede chè a forza di l’accessoriu, u publicitariu dunque, senza fondu propriu. In issu ambiu di munutunia spicca u Festivale di a ruralità arrimbatu si à a via San Martinu chì elabureghja un turisimu culturale, fendu lu vivu u patrimoniu, è rispunsevule, participendu in lu frattempu à a rivitulita di l’internu.

Per compie aghjustemu un affarucciu. Ci sò ancu lochi vioti chì, per ùn spaventà a ghjente, si vestenu cù a sulennità di l’anticu. L’Atrium, à tempu casamentone è metafora, dicerà qualcusella à nantu à a manera di cuncepisce l’assestu urbanu isulanu è di pensà e leie suciale chì si ricumponenu. Veneria faciule di capulà in l’idea angusciosa di u tramontu di una sucetà chì incuragisce a passività, invece abbisogna un’andatura originale è adatta à u territoriu.