Tribune Lingua Corsa – Janvier 2015

Da Sebastianu Quenot

Hà vintu l’Euromillion u Papa. Nò, micca ch’ellu ci avessi ghjucatu. Hà fattu tombula cù i sò tanti discorsi. Ci hè passatu tuttu : famiglia, matrimoniu, tulleranza, difesa di e minurità, sensu di u cumunu. Temi anziani posti à l’epica di a Riforma ma quistione sempre vive per e nostre sucetà multiculturale. À l’incapu di a più vechja stituzione di u mondu, pare capace u Papa à dà li un sensu per i più giovani è per i più miserosi. Megliu, hè vultatu à i valori generosi di a religione senza esse radicale ma prugressista. Curagiosu dinù, andendu à l’incontru d’una bella parte di i soi. Cù e tante mosse di e nostre sucetà, a Chjesgia avia bisognu d’un discorsu puntillatu nant’à canali novi, purtatu da un surrisu capace à dà fiatu à i domi, à e loghje è à i campanili di i tempi landani. Più difficiule, à colpi di cuncistori è di viscuvati, rinnuveghja u so discorsu da cima in fondu per currisponde à u campà, à i strazi è à i sogni di u mondu d’oghje.

#VechjuFaceNovu

Sta sfida per a Chjesgia si pone à tutte l’altre stituzione publiche, Stati o partiti pulitichi più veloci à fà u novu cù u vechju è à circà suluzione anziane à prublemi novi chè à inghjennà l’avvene. Simu in u 2015, una data assai dipiù avanzata chè e date di certe opere di scenza fizzione ma certi campanu oghje siccome eramu sempre durante e Trenta Gluriose. Allora culpevuli è vigliacchi i partiti ? Podassi, ma cù a cumplicità di i citatini. Cusì dice un sundame CSA nant’à u sintimu di i francesi nant’à a Francia. Per u più, volenu tene u mudelu francese o peghju, l’idea bella ch’elli si ne facenu elli, prutettore ma senza costu. Botte piena è  moglia zuffa! Megliu, 54% vulerebbe ricullà cù Peter Pan à l’agrottu di u tempu passatu. In stu cuntestu, ùn hè micca una surpresa di sente à sicutera in bocca à i pulitichi idee chì anu fattu a Francia ma chì oramai ognunu ci mette un altru sensu in ste parolle valisge, polisemiche è polemiche dinù.

e-laicità

Oghje ghjornu quella chì face u buzz ghjè a laicità. Hà sette barette, una caccia è l’altra mette. Cusì hà dettu Jean Baubérot, spezialistu intervenutu pocu fà à l’Università di Corsica. Ognunu sà ciò ch’ella hè ma nimu ne pò dà una definizione universale, chjara è netta per via di e so eccezzione nant’à u territoriu cum’è in Alsazia o di e so evuluzione in u tempu secondu l’inghjochi suciali di u mumentu.

S’è à u pianu filusoficu in e nostre sucetà demucratiche, a libertà di cuscenza pare un acquistu forte, a separazione di u puliticu è di u religiosu cù a neutralità di u spaziu publicu face sempre puttachju cù l’affare di u velu, di l’arburu o di u presepiu di Natale. Cumu spiccà u cultuale di u culturale? In un mondu duve ella si vede di più in più a diversità culturale, a neutralità di u spaziu publicu ùn pò più tene cum’è centu anni fà, quandu in Francia, u puliticu battagliava solu contru à a presenza di a Chjesgia in u Statu è l’esistenza di e minurità linguistiche è culturale. In un paese chì a so tradizione pulitica l’hà purtatu à gestisce a diversità cù u bastone à nome di l’ugualità è di l’assimilazione, a demucratisazione di e sucetà l’impone di sbrancà u Minitel. Cù u cambiamentu d’annu, serebbe ora quantunque di fà una piccula messa à ghjornu.

A secularisazione di a diversità

A crescita di a diversita è di e rivendicazione particulare interrugheghja u vechju mudellu di laicità è di u campà inseme. Sintimu d’islamofubia per i musulmani nati in Francia, sintimu di pruibizione è di perdita per l’altri, ogni cuncessione à nome di u culturale o di i diritti individuali per d’altre religione diventa un offesa per a soia. À nome di a laicità, si pò difende tuttu è u so cuntrariu : a pruibizione di u velu à nome di a libertà di cuscenza ; a libertà vestimentaria à nome di a libertà individuale ; u finanzamentu publicu di u cultu per limità l’influenze private è furestere nant’à l’Islam eurupeu è tira avanti è tocca. Sti pochi anni, ci hè quantunque da dumandà si s’è à caccighjà i segni d’appartinanza in una guerra picrucculina, a laicità ùn serebbe micca diventata una forma d’intullerenza, siccome venianu ghjustificati l’odiu o e viulenze contru à chì campa una fede sfarente.

A Corsica indipendente era stata un mudellu di laicità aperta, cù un putere puliticu rifalatu in terra in manu à l’omi, cù un innu certu religiosu ma naziunale è un apertura à i Ghjudei quandu à listessa epica, eranu cacciati da l’altri paesi. Oghje dinù u Diu vi salvi Regina ùn sona più tantu cum’è cantu religiosu ma cum’è musichella generosa in cuntrastu cù u « sang impur ».

Mica solu credenze

In un mondu sculpitu à colpi di tweetti, di pettu à u dulore di e persone tocche da e viulenze razziste, l’urgenza passa per suluzione à longu andà. Al di là di u mischju socioculturale ch’ella deve prumove a Scola publica, hà una respunsabilità in l’insignamentu di a storia, di u sensu è di e sumiglie trà e religione viste cum’è fatti è micca solu cum’è credenze. A cuniscenza è a capiscitura di l’altru, ghjè u primu passu versu a tulleranza è a custruzzione d’ « acconci ragiunevuli » cum’è à u Canadà, trà e cummunità culturale è e religione di tutte e mamme. Cusì longa l’operata ! Simu in u 2015 avà, ci trica l’ora digà.