Tribune Lingua Corsa – Mai 2015

Per un fanatisimu di l’educazione

 Da Sebastianu Quenot     Duttore in sociolinguistica 

L’integrisimu di l’Islam puliticu hè u fratellu di l’intullerenza di un certu Cattulicisimu, mamma di l’Inquisizione. Hè u fratellu dinù di u culunialisimu di l’universalisimu francese da Dunkerque à Tammanrasset. Hè u fratellu di tutte e dittature arricate da l’ideulugie pulitiche di u 20u seculu : fascisimu, nazisimu, cummunisimu. Ogni duttrina religiosa o pulitica cunosce un ghjornu e so sviature stremiste. Ancu s’è stu Giatu ùn hà nunda à chì vede cù a religiosità è a fede di i veri musulmani, a forma oghjinca di u radicalisimu puliticu si face à nome d’una religione. Malgratu seculi è seculi à luttà contru à l’ignuranza è u versu luminosu d’Omar Khayyam mille anni fà, ùn c’hè manera di caccià a tentazione di u fanatisimu in core à l’omu. Cambia solu a mascara. S’ellu hè umanu per ogni leva di circà si un sensu, una storia da scrive, sti pochi tempi, di più in più giovani francesi nati è affanati in e banlieues ch’ùn ponu accede à e chimere di a cunsumazione vedenu in u racontu di l’Islamisimu è u so radicalisimu puliticu un andatura chì spiega l’immigrazione di i so parenti in Europa, a so ghettuisazione in periferia, e so discriminazione à l’impiegu. À u livellu internaziunale, più chè a guerra in Gaza, l’abbandonu di a Siria in manu à un dittatore hà inghjennatu un sintimu d’inghjustizia imbulighjatu à una brama sincera d’umanitariu, di neocummunitarisimu è ogni tantu di fundamentalisimu dinù. D’un batticore pò nasce l’infernu.

prevenzione 

Cù Merah, Coulibaly è i fratelli Kaouchi, a Francia hè u solu paese d’Europa à vede i so figlioli affundà in a viulenza. Più chè da a banda di a diplumazia francese, ghjè in core à e viulenze simboliche è fattive di u mudellu laicistu chì ricusa u multiculturalisimu chì ci vole à visticà. E cause ùn sò scuse ma à chjode l’ochji di pettu à a realità di l’infamu campà in e banlieues, u periculu serebbe di fà cresce una parte di a pupulazione contru à l’altra. Dipoi u focu di u 2005 in Clichy-sous-bois si sò visti dui magrebini è omi di culore à a televisiò o à u guvernu, ma à parte sta discriminazione pusitiva videvule, a pulitica di a cità ùn ci l’hà fatta à cambià u campà di sti giovani. Peghju, à u so disimpiegu risponde u sintimu d’insecurità è oghje di psicosa di l’altri. In un tempu di crisa ecunomica, sò quelli giovani senza diploma nè furmazione à esse i primi tocchi. À u so fanatisimu religiosu deve risponde u nostru fanatisimu di l’educazione, u solu capace à dà li un altra via per un altra vita. Per islamofubia o per paura, a facilità serebbe di dà a preputenza à a pulizza nant’à a Scola, o peghju, in una Corsica troppu armata à una vindetta privata.Ghjè propiu avà quandu in a scola francese a currelazione trà l’urigine suciale è i risultati sculari hè sempre più forte è sempre più decisiva chè in altrò chì ci vole à difende l’educazione. U cuniscimu troppu bè l’infernu di l’angelisimu securitariu. Facia ancu ride di sente à Roger Marion nant’à France Info in prufessore spiegatuttu, dopu anni è anni di malfatte di l’antiterrurisimu in Corsica. Di manera generale è per definizione dinù, ste pulizze derugatorie à a norma vanu à l’incontru di i valori ch’elle pretendenu difende. Attenti dinù à ùn lascià a so anima cù un Patriot Act à l’usu francese duve l’America hà persu u rispettu di e libertà fundamintale senza vince l’Islamisimu. Un altra malatia à curà ghjè l’islamofubia. U mal’esse è u mal’campà di a pupulazione si sprime ancu quì. Ci ne scurderiamu quasi digià di a crescita di l’estremismi senofobi, in prima pagina di a stampa a vigilia di l’attentati. L’arte è a cultura ci anu u so rollu dinù in a messa à palesu di a faccia assassina di u fanatisimu à quelli chì da luntanu ne serianu in brama. Ci hè di più trasgressione è libertà in un libru, un filmu o un disegnu chè in una kalachnikov. Sustenimu quesse l’arme, quelle di a mediazione culturale è di a pace.

 Emuzione
Un emuzione cusì forte ùn s’era micca vista in Francia podassi dipoi a Liberazione. Ma chì ghjera a so natura è i so valori prufondi?  Libertà di spressione? Sò stati cusì lestri i media francesi à cundannà a “pruvucazione” di Jean-Louis Leca cù a nostra bandera, ch’ella pare difficiule à crede. À vede certi capistati presenti à a manifestazione di l’11 di ghjennaghju, l’affare hà pigliatu u versu d’una carnavalata dinunziata subbitu da i Ripurtarii Senza Fruntiere. Per umanisimu? Pare stranu dinù, quandu à listessu tempu, à u Nigeria, Boko-Haram tumbava 2000 persone in u silenziu è l’indifferenza generale. Indifferenza duve elle sò cascate e liceane vendute per duie baiocche. Per ricusu di l’integrisimu? Aiò, aiò! Mancu à dilla quandu omu cunosce u statutu fiscale particulare di u Qatar in Francia! Sò stati ghjorni d’angoscia pazza. Avenu vistu ghjurnalisti circà u scoop è l’audienza à tutti i patti ghjucà cù a vita di l’altri. Quandu l’emuzione vince l’infurmazione, si perde u capu. Stranu quantunque. 11 di sittembre ci n’hè quasi tutti i ghjorni in u mondu ma stanu zitti. In quantu à i pulitichi di tutte e mamme ch’anu battagliatu per esse in prima ligna di e marchje, l’aspettemu oramai più nant’à i valori ch’elli contanu difende in i so prugrammi chè nant’à e so strategie di recuperazione di l’orrore. Allora amichi, ponu turnà à dì ciò ch´elli volenu i più putenti di stu mondu, u più chì preme sò i fatti chjuchi, in paese, cù l’amichi è i vicini, ghjè a cunfidenza di i nostri sguardi nant´à l’altri.