Tribune Lingua Corsa – Mai 2016

Averemu forse inventatu un tippu novu di calindariu, o si puderia ancu dì ch’è no avemu trovu una manera particulare di misurà u tempu.

Par Petru Santu  Menozzi

Dapoi ch’ella hè principiata di dicembre a mandatura naziunalista, si face segondu u ritimu di e vicende chì si succedenu o di e peripezie chì, cum’è in i raconti di fizzione, anu per obbiettivu di ùn cappià l’attenzione di chì ne hè spettatore quì. Certe sò accadute à l’ispensata, l’altre, à rombu di aspettà le, essendu sicuru omu di a so affaccata (cù fatalisimu una cria è, curiusità appena, da vede s’è no riesceriamu à cunnosce situazione simule) si sò realizate. Quella di u bugettu di aprile scorsu, di più chè un esempiu, saria un indiziu permettendu di avventà un modu di cuncepisce a pulitica è di praticà la. Dimu la subbitu, ùn si vulerebbe ch’ellu fussi lettu u testu solu cum’è una occasione di turnà à incalcà u chjodu – chì omu intendessi puru a parolla in i so varii significati – è rimpruverà l’attitudine di unipochi di pettu à inghjochi maiò, è à a maghjina data di e stituzione. Hè bella capita chì u dibattitu criticu hè necessariu è, hè di pettu à e difficultà è l’inciampi  ch’ella si pò ricunnosce a capacità di chì guverna à avvià è difende un prugettu.

Spectaculu messu i, scena

Ma sti pochi tempi ci avvicinemu di più à un spettaculu messu in scena – bisugneria à aghjustà « realizatu senza trucchi » –  da tene in alitu un publicu in l’attesa di un sciuglimentu, cagiunendu spessu oghje l’esasperazione. Tandu, perchè sariamu stupiti di vede cresce issa perdita di cunfidenza è issu sintimu di misfidenza voltu i raprisentanti pulitichi ?

Stu fattu ùn si sprimeria solu – è ùn si puderia misurà –  cù a scelta di l’astenzione, pensendu ch’ellu hè diventatu u citadinu di più passivu. Ci vuleria, invece, à cunsiderà ch’ella ci hè stata una mutazione, cum’ellu a scrive Pierre Rosanvallon, è chì i citadini disponenu, fora di u votu, di altre forme di participazione (inde l’associ per indettu).

U to nome o demucrazia

Hè in stu ambiu chì, à un livellu largu assai, si multiplicheghjanu dibattiti è iniziative ingiru à u fattu demucraticu. Ma si cercheria sempre u sensu di a parolla « demucrazia » chì pare firmà imprecisa o chì ùn suddisface più oghje (daretu à a parolla ci sarianu e vie da pensà pratiche diverse), vene dunque adurnata da qualificativi parechji chì ci puderianu ancu perde : da « in crisa » à « nova », da « diretta » à « participativa ».

Si ponu quantunque ritene dui esempii. U muvimentu DiEM25, ch’ellu cunduce Yánis Varoufakis, anzianu ministru di e Finanze di u guvernu Tsipras, vole cambià di manera prufonda u funziunamentu di e stituzione di l’Unione aurupea chì averianu participatu à « depulitizà » i populi di i Stati membri, scantendu li di i dibattiti. Frà l’obbiettivi da mette in opera da quì à u 2025, u muvimentu prisenta a necessità di demucratizà l’Auropa, da ch’ella ùn affondi, assicurendu a trasparenza (si ritrova ancu quì a parolla) di a presa di decisione, luttendu contr’à a crisa ecunomica. Ma, ci hè da interrugà si in quantu à u pesu puliticu ch’ellu pò avè stu muvimentu, s’ellu ùn hà da firmà, solu cù a forza di u discorsu, in u duminiu di l’utopia.

L’altru esempiu, ma manca a distanza da pudè ne parlà, sò ste azzione « Nuit debout » chì permettenu à a parolla libera di ripiglià pusessu di u spaziu publicu, in u cuntestu di e manifestazione contr’à a lege Travagliu – d’altronde di’sse prublematiche si ne sò imprimurati pocu i sindicati studientini, pensendu, soca, chì e riforme « naziunale » ùn tuccheranu l’isula, o per via di una mancanza d’interessu. Stu muvimentu, apparagunatu à Occupy in i Stati Uniti o à e mosse spagnole, vole tene a so singularità stendu attente à e recuperazione chì veneranu forse. Eppuru si ponenu parechje dumande, quelle di a raprisentazione è di e rivendicazione chì ùn sarianu abbastanza chjare, di e difficultà à sparghjesi à l’indrentu di a cità parigina è in altri lochi di u territoriu, di un prugettu iscrittu in un tempu longu.

A spicanza si allarga

Stu muvimentu, chì hà pigliatu per surpresa i partiti pulitichi, soprattuttu di manca, hà palisatu a so incapacità à percepisce ciò chì si pruduce è, à tempu, a spiccanza chì si allarga sempre trà u carrughju è l’assemblee.

À l’accorta è per cunclude, ci hè stata, un mese fà, una ghjustra filosoffica liceana, si trattava di sapè s’ella era o nò a demucrazia u regime più bonu. Amminteremu una idea chì hè stata spressa, invece di parlà di regime più bonu, ci vuleria à sapè di chì manera megliurà lu, travagliendu à l’educazione pulitica di i più giovani.