Inciampi

Si pesa u tendone. Figuremu ci ch’ella hè sola una cumedia, chì e parolle prununciate abbianu per unicu obbiettivu quellu di pruvucà a reazzione di un publicu – risa o pientu. Tamantu piacè saria.

Petru Santu Menozzi 

Ognunu aspetteria u « gag » – a solita fisica senza a quale ùn seguiteria a strada bona a pezza – fendu nice di esse surpresu quandu si avvicina u mumentu, dendu una guvitata à un spettatore vicinu, cum’è per dì ch’elli appartenenu à u chjerchju di quelli chì sanu, accumpagnata da una scaccanata : « Tè, è puru a ci hà fatta quella di l’identità ! ». Ma ùn hè statu tantu comicu u discorsu di l’anzianu presidente di a Republica. Hè firmata l’impressione di un scherzu fiascatu è si hè risu amaru.

Si cridia à l’anticogna issu mottu « nos ancêtres les Gaulois », ma hè vultatu per aria, da affirmà ch’ellu era sempre unu di i puntelli sodi di una identità chì unipochi di pulitichi vulerianu vede impernata è bè. Di fatti, a tematica di l’identità, cù a mansa di l’aghjettivi da qualificà la (a vera, a felice, a fatta è lesta cum’è s’elle eranu pisciaie litichendu si à u mercatu) hà pigliatu pusessu di u dibattitu è diventerà forse un inghjocu di a prussima campagna di e presidenziale chì, à ogni partitu è candidatu li hè intimatu di sprime ciò ch’ellu ne pensa.

Rumanzu naziunale

Issu bisognu di circà radiche cusì prufonde, ciuttendu in a mitificazione, spechja una inchietudine chì cunduce à fruchignà in u passatu da turnà à assicurà elementi custitutivi di una identità. Per via di’ssa primura genalogica, si manda via, tandu, i studii chì anu mustratu ch’ella era custruita à pocu à pocu, segondu i periudi storichi è i puteri. Bella sicura vene più comudu di cumpiace si in u cusì dettu rumanzu naziunale, strumentalizendu a storia è scantendu quella scentifica. Si torce dunque, in modu cuscente, l’usu di a disciplina ; megliu forse à arrimbà si à st’arte di l’emancipazione chì, cum’ellu a disse Patrick Boucheron « la recherche passionnée de l’identité est contraire à l’idée même d’histoire ». Più bella rinfacciata à issi discorsi chì si sparghjenu hè u tema, quist’annu, di i Rendez-vous de l’histoire in Blois : « parte », vene à dì fà a storia di l’emigrazione, micca solu da u puntu di vista di i paesi chì accoglienu, ma interrughendu si dinù nant’à e cundizione di partenza.

Identità felice

In quantu à a Corsica, ùn a si hè franca di a discursata identitaria. Pocu fà in visita inde l’isula, Alain Juppé, ne averà fattu ancu troppu, scegliendu la cum’è mudellu da illustrà u so cuncettu d’identità felice. Sarà chì, à le volte, scappanu prestu e parolle senza riesce à cuntrullà le. Sarà statu sinceru o vulia ammasgiulà i prubabili elettori, in tutti casi ammantava cusì unipochi di prublemi ch’è no cunniscimu. Ma hè stata detta quantunque chì l’isula era una regione specifica è ci vulia à cuncede li un statutu particulare, certi a sanu dapoi un bellu pezzu, per d’altri dipende di i ghjorni.

Per chì hà fattu u sforzu di leghje fin’à avà, li hà da parè scusgitu assai questu prupositu, forse ci si puderà quantunque percepisce qualchì leia. Hè certa chì, à spessu, l’attualità vene è intisge ciò chì omu pensava sicurezza, da accresce appena di più u numaru è u pesu di l’interrugazione, cù per scummessa, quella di pruvà à capisce u spaziu allargatu si di l’inforse. A cunclusione di a manifestazione di u 15 di ottobre scorsu, ci impuneria di fà una piccula arretta chì, puderia insegnà ci  parechji affari – fendu ci dinù riflette – frà i quali, à cicchiciambara : una cuncurrenza trà i modi di azzione chì ponu, segondu quelli aduprati, pruvucà u disapprovu di a pupulazione (ancu puru quella chì scumparte listesse rivendicazione) è forse una distanza chì issi gruppi cercherianu à mette in scena trà a raprisentazione naziunalista eletta è elli, ricusendu ne l’auturità, o a legittimità.

Cultura pulitica

Ma vene difficiule di situà isse decinaie di persone decise à ghjuvà si di a viulenza per sprime un messaghju chì ùn hè mancu appena capiscitoghju. D’altronde, si pò omu dumandà chì sensu averia issa forma di cuntestazione – s’ella si cunsidereghja cusì – postu chì prove o elementi di un discorsu cuerente di pettu à ciò ch’elli parenu dinuncià, ùn si hè ancu intesu. Mancanza di cultura pulitica ? Nustalgia di l’azzione viulente o gruppu fora di ogni muvimentu è di ogni cuntrollu, apprufittendu di l’occasione per fà danni ? Sò unipochi di mesi, hè mancata pocu ch’ellu accadi simile affare in Corti dopu un’adunita riguardendu l’amnistia, hè stata a reazzione di a ghjente prisente à avè li fatti cambià versu. Issu datu novu cumanderia di più vigilanza da ch’elle ùn fussinu cunfiscate da issi gruppi, l’iniziative pigliate da i manifestanti chì li si puderia appiccicà una maghjina pessima senza esse ne stati à l’origine. In quantu à u raportu ch’elli anu mustratu cù i pulitichi, a sola rumpitura palesa saria quella cù a realità, mettendu in periculu un cuntestu più o menu appaciatu.

A scelta di ammintà issi fatti, ùn era di vulè li dà una impurtanza chì, soca, ùn averianu mancu, ma piuttostu vede li cum’è u segnu di un cambiamentu in i cumpurtamenti di certi chì entreria in uppusizione cù a situazione oghjinca.