Tribune lingua corsa – Novembre 2015

Sebastianu Quenot

Cù a custruzzione di i Stati nazione, dipoi u 19u seculu, l’isula vene ammintata cum’è locu prigiò, locu di chjusura è di cunfine, locu di a minurità cundannatu à a chjuculezza. Fiure literarie cum’è quella di u Conte di Monte Cristo d’una parte, è più tardi, opere cum’è quella d’Angelo Rinaldi o di Marie Susini anu spartu st’idea di chjusura in e ripresentazione di l’isulanità. Scrive in u 1989 : « j’ai été comme un oiseau en cage dans mon enfance, emmurée dans ma condition de fille, prise à l’intérieur de cette cellule aux règles rigides qu’est la famille corse, prise elle aussi dans l’îlot du village, le village bouclé sur lui-même dans un pays tout naturellement isolé, barricadé par la mer ». Sempre oghje, l’isula porta stu pocu è tantu di pesu è di sognu.

Un isulanità muntagnola

À l’infora di i marinari capicursini, a nostra isulanità fù muntagnola. Cun porti è citadelle tenuti da i furesteri, teniamu l’internu cum’è agrottu à l’assalti barbareschi cù a cuscenza di u mare, ma l’isula era ancu à fà. « Pays assiégé, nos hautes vallées furent nos refuges. De la mer venait le danger. » scrive Jean-Toussaint Desanti in u testu « Effacer la mer ». À mezu mare, invece di custruisce nave à girà mondu cum’è l’Inglesi, avemu fattu a muntagnera. Stu sintimu doppiu d’arradichera prufonda à a terra è di brama d’altrò, hà inghjennatu una literatura di u disprezzu, surella di l’auto-odi, ch’ellu spiega bè u cuncettu di « paratupia » di Dominique Maingueneau. Serebbe sta «  lucalità paradussale, micca l’assenza di locu ma a neguziazione pattighjata trà u locu è l’alocu, impussibile à stabilizà ». Eppò, cù a cunquista di u liturale dipoi u dopu guerra, si sò impatruniti i Corsi di certe terre abbandunate à a malaria è s’hè spartu u sintimu d’isulanità cù un raportu più appaciatu à a terra è à u fora.

Un isulanità pulitica

Oghje chì ghjè oghje, l’isulanità cum’è attu d’affirmazione pulitica face sensu è cunsensu. A palesa a denuminazione di e liste per e prussime elezzione territuriale.  Eppuru, al di là di e nostre sponde, à guardà u ritrattu pigliatu da a stazione spaziale internaziunale, si vede un infinitu turchinu è dui pezzi di  terra : Corsica è Sardegna strinte cum’è dui picci, duie isule surelle vicine vicine. Quale ùn hè statu surpresu di tamanta vicinanza di punta à stu ritrattu? Averemu bisognu d’andà in u spaziu per scopre i nostri circondi ? À ghjorni d’oghje, a geugrafia fisica ùn dice nunda di a nostra geugrafia suciale. Si sò ammutulite o quasi e bocche di Bunifaziu. A linea trà Bunifaziu è Santa Teresa hè più chè mai in periculu è al di là di e dichjarazione d’intenzione, d’una sponda cum’è da l’altra, ùn s’hè vistu u principiu d’una vera pulitica di cuuperazione versu a custruzzione d’un Euroregione, cù addunite di i guverni rispettivi di manera à purtà à u livellu di l’Unione Eurupea, una voce cumuna.

U numericu, a fine di l’isulanità ?

Cù  l’anni, s’hà da alzà u mare in giru à a nostra isula. Si n’hà d’andà a rena, surpata da i marosuli. Cusì dicenu i spezialisti di u clima. Eppuru, cù u numericu, a mundialisazione l’assecca u nostru mare. In i paesi ricchi, cascanu e fruntiere cummerciale è intellettuale. L’università pruponenu i so Mooc è e so più belle cunferenze nant’à Youtube. U sapè ùn hè mai statu cusì liberu d’accessu. Ancu s’è u nostru patrimoniu vene di più in più numerizatu è messu in valore, l’appartinanze culturale ùn sò mai cusì pocu liate à u territoriu. Diventate modi di cunsumazione numerica, e sucialisazione venenu in cuncurrenza una cù l’altra. U locu di l’educazione ùn permette più un educazione naturale à u locu. S’hà da accresce a battaglia di l’educazione trà a Scola è i modi numerichi di sucialisazione è d’educazione. L’unifurmisazione di a cunsumazione culturale di i giovani di u mondu, u rinculu di u tempu ch’elli passanu i giovani cù i so parenti strettisce u capitale culturale chì li vene trasmessu da e so famiglie. A deterriturialisazione passa per esse una liberazione di l’individuu ma u stacca da i soi. Serà quessa l’ugualità di e scenze ? A geugrafia culturale vene oramai cartugrafiata è ammaestrata da l’algoritmi di Google è di Facebook. A persunalisazione di i cuntenuti numerichi, invece d’apre a sperienza di l’individuu à d’altri mari, u chjode à l’isulanità di e so appartinanze primaticce, quelle ch’omu ùn sceglie micca. Di colpu, ogni sperienza numerica vene avviata è ancu antivista da l’algoritimi. A previsione di u cumpurtamentu umanu strettisce e pussibilità di devianza di a so sperienza. Più s’allarga u mondu, più l’imperu numericu di l’individualisimu face di l’omu un isula sola. Finu à quandu, assisteremu imputenti à a fine di l’isula cum’è territoriu è à l’affirmazione preputente di  l’individuu cum’è l’isula ?