Tribune Lingua Corsa – sept 2016

Petru Santu Menozzi

À avè pruvucatu stu testu hè statu l’azardu di un scontru  o piuttostu una cuincidenza trà dui tempi, turnendu à insegnà ci ch’elli ùn sò impermeabili i periudi storichi, ch’ellu si pò sempre percepisce un ecu puru s’ellu hè pocu rimurosu.

L’occasione di una cronaca radiofonica intesa à principiu di lugliu hà permessu di mette in risaltu u carattere cuntempuraneu di un autore è di a so opera chì a fumaccia di u passatu averia ascosu una cria, Machiavelli. Aghjustendu ch’ellu ci pudia dinù porghje attrazzi da dì è riflette u nostru oghje, tempi cuntrarii, ritrosi, chì tutt’ognunu cunnosce, quelli chì u Fiurentinu chjamò « adversi ». Piglià sta arrivinta o ancu digressione, sarà una manera di palisà ch’ella ci vene male à principià, masimu quandu si tratta di scrive un testu chì deveria esse « stellatu da u cuntestu », segondu a formula bella di Ghjacumu Fusina qualifichendu e so Prose elzevire, è chì ci richiede una urgenza chì omu ùn riesceria à definisce di modu chjaru.

Si pudia decide di fighjà altrò, ma a tragedia di Nizza è e so cunsequenze ci anu interpellatu, puru s’ellu ci hè, bella sicura, u risicu di ripete è cummentà cummenti digià fatti – cascheremu d’altronde in sta trappula – da ùn vede ne più nè a fine nè u fine. Dà si à scrive à nantu à un sugettu simule sarà forse, per sè stessu, una prova da circà à capisce ciò chì ci hè statu è, soprattuttu, lampà una ochjata à i discorsi è i dibattiti cagiunati da stu evenimentu.

Coru cacufonicu

Un primu puntu ch’ellu si puderia accustà saria l’attualità di a cusì detta « unione naziunale ». Subbitu subbitu, accurghjimu ci chì, dopu stu attentatu, ùn hà mancu avutu tempu à nasce, quantunque e solite dichjarazione di u guvernu. Sta spressione o fizzione utile, pensemu la cusì, permettia ghjuvendu si di l’emuzione, di dà a primura à u racuglimentu da ch’elle ùn ci sianu troppu critiche è di fà crede à a prisenza di un rampale contr’à u periculu esistente è quellu à vene. Ma à rombu di esse utilizata, averà persu a so forza di persuasione è u presidente di a Republica ùn ci la face più à cunvince a pupulazione ch’ella hè, sta unione, unu frà i mezi principali da superà sti evenimenti. E sfarente prese di parolla di l’attori pulitichi di l’uppusizione l’anu mandata prestu in brumuli, palisendu ne a so debbulezza. S’è no pruvemu à ascultà, à mezu à issu coru cacufonicu, si ricunnoscenu faciule strategie di cumunicazione liate à u cuntestu eletturale. Cù e primarie chì affaccanu, unipochi inalteriati cercanu à strappà si un pezzu di a scena mediatica creendu u buzz, fendu le falà à duie mani à nantu à l’esecutivu, aduprendu « slogans » chì ribumberianu abbastanza bè da creà effetti ; in fatta fine una pulitica di pannelli publicitarii o di emissione di divertimenti. Forse si meritarianu di più cunsiderazione ste prublematiche è l’elettori. Senza esse troppu pessimistu, averiamu quì una prefigurazione di ciò ch’ellu sarà u dibattitu per e presidenziale…qualità pocu è micca.

Statu d’urgenza

Eppuru, ùn si pò nigà chì a meccanica messa in opera dopu ogni attentatu da u guvernu pare arrughjinita oghje. U schema chì funziunava sinu à avà seguitendu e trè tappe : chjama à l’adunita, annunziu di misure o u so rinforzu, ripiglià u so cutidianu, ùn accuntenta più nimu. À tempu à una spezia di fatalisimu è un sintimu d’imputenza, si sente cresce di più in più forte una dumanda d’azzione da parà si da e minacce terruriste. Da risponde ci, certi si danu à prumove misure chì, da sudisfà a ghjente è rassicurà la, s’avvianu ver’di un eccessu securitariu cù i periculi chì ne ponu nasce. Hè capita, suluzione belle è fatte ùn cascanu da u cele è l’equilibriu hè sempre difficiule à truvà.

Si hè pussutu tuccà i limiti di l’efficacità di u statu d’urgenza. Venerà quantunque prulungatu, ùn si sà propriu per quantu tempu, trè mesi, sei, o sinu à e prussime elezzione. Li si toglie u so carattere tempuraneu è un periudu chì devia firmà di eccezzione si stabilisce cum’è una nurmalità. Si pò suppone chì i deputati, mentre i dibattiti à l’Assemblea, saranu in l’obligu di mustrà ch’elli piglianu decisione di più forte, omancu per l’upinione, a difficultà sarà di sapè s’elle sò adatte à a situazione.

Silenziu rispettosu

Un ultimu affare, sfiuricciatu appena, si vede una multiplicazione di i punti di vista è articuli di analisi da prisentà i sfarenti periculi chì puderianu esse inghjennati da sti evenimenti, masimu s’elli si ripetenu : tensione cumunutarie, viulenze vindicatrice cundutte à l’appiattu o à palesu da muvimenti estremisti o da individui soli,… Issi risichi, prubabili, chjamanu una vigilenza cullettiva, esse attente dinù à l’usu puliticu ch’elli facenu unipochi di l’emuzione cum’è a paura (stu fattu hè studiatu di manera precisa da Corey Robin è Patrick Boucheron in i so libri).

Dopu stu attentatu di Nizza, hè mancatu issu mumentu duve tuttu tace da rifiatà un pocu è piglià cuscenza di ciò chì era accadutu. Abbisugnava prima un silenziu rispettosu, emu avutu invece u bufunime di u vespaghju. Sarà torna, forse, un indiziu di u scartu trà una parte di u mondu puliticu è a pupulazione.