TUTTA A VERITÀ SOLU A VERITÀ… A ghjurate ?

Nicolas Rutily :

iè a ghjurgu ! Allora pudemu principià…

Par Vannina Angelini Buresi

Mi prisentu: Aghju 64 anni, sò più à a ritirata chè travagliendu ma travagliu sempre un pocu, hè u me terzu mandatu, sò merre di u me paese Ortu.

1.Par voi, a tarra, chì vole dì ?

A tarra, hè u valore u più impurtante di a Corsica, s’ellu ùn ci hè tarra ùn ci hè nulla, ùn sì manghja micca, ùn sì campa micca. A tarra hà un valore inestimebbule.

2. Parchè impegnavvi in a vostra cumuna ?
Hè un affare di trippe, eiu sò natu quì, aghju sempre campatu quì sò arradicatu à u me paese, ùn possu micca campà senza ellu, hè par questa chì mi sò impegnatu.

3. Da fà campà u rurale è i paisoli, chì ci vole à fà?
Da fà campà sopratuttu i paesi di muntagna, ci vole aghjà chì a ghjuventù piglii cuscenza chì l’avvene hè quì. Ci vole ch’elli s’impegnenu i ghjovanni è dopu andarà.

4. In tantu chè merre, qualesse sò e vostre dificultà ?
Ci hè pocu ghjente d’invernu è appena di più travagliu d’istate. Quì in li paisoli avemu e listesse prublematiche chì in e cità più maiò, u travagliu hè listessu ma e dificcultà sò multiplicate par 3 o 4, di fattu chè no semu soli.

5. I vostri prughjetti?

Avemu travagliatu abbastanza bè nantu à a nostra cumuna, tuttu ciò chì hè strutturante hè aghjà statu fattu, l’acqua eccetera. Avà semu più in a resturazione di u patrimoniu, e strette, i giardini…

6. Chì Sucetà chì prughjettu par A Corsica, sicondu à voi?
In prima locu ci vole à sente si corsu in u spiritu è ind’è l’anima è dopu i prughjetti anu da esce da par elli ma prima ci vole à esse corsi, ci vole chì a ghjente sì sintesse corsa.

7 L’autunumia sì ne parla di più in più, a vidite cumu ?
Hè di natura à a Corsica. Semu autunumisti di natura, ùn sì n’avaria mancu da parlà, sì a ghjente sì tene bè è travaglia par u so paese.

8. Rigreti n’avete?

Innò ùn rigretu nulla!

9. Chì ricuminciariate?

Tuttu ricuminciariu, senza mancu riflette, aghju passatu anni in muntagna, aghju stantatu u me pane quì in casa meia, ùn sò mai partutu di Corsica, ùn vularia scambià nulla.

10. Sete in esiliu, vi tocca à cambià di locu incù a cundizione d’esse impegnatu in pulitica altrò. Induve andate è parchè ? Hè difficiule par mè di risponde, chì u me ciarbellu ùn pò micca capisce què, ùn possu micca campà in altrò. Da veru ùn la sò.

11. Avà, scuntrate à Emmet Brown un parsunnaghju di fizzione, u prufissore «scemu» di «Retour vers le futur», vi permette di vultà cù a sò vittura, in un’altr’epica, a qualessa scigliite ?
Mi sentu bè à a me epica. Forse 50 anni nanzu ma ùn sò chì a vita d’oghje hè quantunque bella. Ma 50 anni nanzu parchì micca, da ritruvà tutti l’anziani di u paese da pudè amparà torna di più è cuntinuà sta leia cun’elli chì ci anu lasciatu tanti affari.

12. Intirvista compia, hè compia a vostra vita (bella sicura, u più tardi pussibbule !). Hè ghjunta l’ora… Vi ne cullate in paradisu, San’Petru v’aspetta è vi lascia trè favore :

A prima : Par l’eternità di stà vi ne vicinu à qualchissia chì campa quassù.
A me mamma.

A siconda: D’avè u putere di cambià qualcosa nantu à sta tarra è micca forse in Corsica
Vulariu di più pace è amore.

A terza : Di vultà prestu in casa à circà un oghjettu caru.
Una ghitarra.